Savjet bezbjednosti Ujedinjenih nacija u ponedjeljak je usvojio rezoluciju kojom se traži hitan prekid vatre u Gazi tokom ramazana, koji bi potom prerastao u trajni i održiv prekid vatre, javlja Anadolu.
Čak 14 zemalja glasalo je za rezoluciju, koju je predstavilo deset izabranih članova Savjeta, dok su Sjedinjene Američke Države bile uzdržane.
Rezolucijom se poziva na “trenutni prekid vatre tokom ramazana koji će poštovati sve strane, što će dovesti do trajnog i održivog prekida vatre”.
Traži se u “trenutno i bezuslovno oslobađanje svih talaca, kao i osiguranje humanitarnog pristupa za rješavanje njihovih medicinskih i drugih humanitarnih potreba”.
U zvaničnom tekstu se navodi da strane treba da ispoštuju svoje obaveze prema međunarodnom pravu u odnosu na sve osobe koje pritvore.
U rezoluciji je naglašena “hitna potreba da se proširi dotok humanitarne pomoći i poboljša zaštita civila u cijelom Pojasu Gaze”, a ponavlja se zahtjev za uklanjanje svih prepreka pružanju obimne humanitarne pomoći, u skladu s međunarodnim humanitarnim pravom, kao i rezolucijama Savjeta bezbjednosti.
Za genocid optuženi Izrael pokrenuo je smrtonosnu vojnu ofanzivu na Pojas Gaze nakon prekograničnog napada Hamasa 7. oktobra u kojoj su ubijena najmanje 32.333 Palestinca, dok je broj povrijeđenih 74.694.
Po tužbi za genocid koju je pokrenula Južnoafrička Republika, Međunarodni sud pravde je 26. januara presudio da se Izrael mora suzdržati od bilo kakvih radnji povezanih s ubijanjem, napadima i uništavanjem stanovnika Pojasa Gaze i poduzeti sve mjere da spriječi genocid.
izvor: AA
